வீரான்குட்டி கவிதைகள்

 வாசிப்பு 

வலையில் சிக்கிய பட்டாம்பூச்சி                                                                  

சிலந்தியிடம் சொன்னது 

உன்னுடைய வலை 

ஒரு அபாரமான கலைப்படைப்பு 

அதில் மூழ்கி 

இல்லாமலாகவே நான் வந்தேன்.

கலைக்கு நம்மை 

இழுத்து முறுக்கிக் கொல்வதற்கான

வல்லமை வேண்டும்.

ஒவ்வொரு வாசிப்பிலும் 

குருதி கொதிக்க 

மூச்சடைத்து துடிக்கவைக்கும் 

உனது வலையில் 

எனக்கது முழுமையாக 

கிடைக்கப்பெறட்டும்

"சிறகுள்ள வாசகியே,

மரணத்தருவாயிலும் 

உன்னால் இப்படியெல்லாம் 

சிந்திக்க முடிகிறதே" என 

சிரித்தபடி சிலந்தி 

வலையை மெல்ல அதனைச் சுற்றி 

இறுக்கத் தொடங்கியது 

"துடிக்கத் துடிக்க 

என்னை நீ உனதாக்கிக்கொள்"

கண்களை மூடி 

பட்டாம்பூச்சி ஊக்கப்படுத்தியது

"கலைப்படைப்பை அணுக 

புனித தூரம் ஒன்று உண்டு"

வலையில் சிக்காமல் 

சுற்றிப் பறந்த உயிர்கள் 

அழைத்துச் சொன்னது 

பட்டாம்பூச்சிக்கு கேட்கவில்லை 

ஒவ்வொரு வாசிப்பும் 

ஒவ்வொரு மரணம் 

என்ற அறிதலில் 

அனுபூதியின்

கடைசி இறுகி அணைத்தலின் ஏக்கத்தில் 

ஒரு ஊஞ்சலில் கிடப்பது போல 

அது சாய்ந்து கொண்டது

***

நியூட்டனும் ஆப்பிளும் - ஒரு முரண் கவிதை

"Gravitation is not responsible 

for people falling in love. "

                                          Albert Einstein

“ஒரு ஆப்பிளால்

 நியூட்டன் எப்படி 

இவ்வளவு பெரிய

தத்துவத்தில் வீழ்ந்தார்?

வியப்பாக உள்ளது”

“அதில் ஆச்சரியப்பட ஒன்றுமில்லை

தலையில் விழுந்த ஆப்பிளை எடுத்து 

மேலே பார்த்த நியூட்டன்

அங்கே ஆப்பிள் மரத்தை

காணவில்லை.

எங்கிருந்து வீழ்ந்தது ஆப்பிள்?

விண்ணிலிருந்து வீழ்ந்திருக்கலாம்.

ஆப்பிளில் பதிந்திருந்த

பற்தடங்கள் சொல்லின.

ஏதேன் தோட்டம் ஞாபகத்தில் வந்தது 

சொர்க்கத்தின் முதல் காதலர்கள்

கடித்த கனி

பிரபஞ்சத்தின் ஆகப் பெரிய

ஈர்ப்பு விசையைப் பிழைத்து 

ஏராளம் ஒளியாண்டுகள் கடந்துவந்த

ஞானப்பழம்

விலக்கப்பட்ட கனியை

கையில் வத்திருந்தது குறித்து

கேட்க வந்த மதகுருவிடம்

நியூட்டன் சொன்ன பொய்யாய் இருக்கலாம் 

'புவியீர்ப்பு விசை'

அதன் பிறகு

நியூட்டனை நிரூபிக்க 

எல்லா பொருட்களும்

பூமியிலேயே விழவேண்டியிருந்தது 

என்பதுதான் உண்மை

தொடுக்கப்பட்ட அம்புகள்

ஏவுகணைகள்

நடனமங்கையின் பாதங்களென

புவியீர்ப்பின் விதியை

சவால்விட வந்த எல்லாமும்

அதை மேலும் 

உறுதிப்படுத்தவே செய்தன 

ஆனால்

மரணத்திற்கு பின்

பூமியிலிருந்து சொர்கத்திற்கு

உயர்ந்துயர்ந்து செல்லும்

நியூட்டன் தத்தாவை கண்ட 

குழந்தையின் சாட்சியாய்

நான் சொல்வேன்:

ஒவ்வொரு அற்புதமும்

நிகராகவும் அதற்கு எதிராகவுமான

ஒரு முரணை

தன்னகத்தே வைத்திருக்கிறதென "

- வீரான்குட்டி

தமிழில் (கவிஞர் ஆனந்த் குமார்)

***