சிரத்தையோடு மலர் கொய்து
கடவுள்களை அலங்கரிக்கிறாள்
ஒரு வனிதை
அவளுக்கு
கனவுகள் இல்லை
கண்ணீர் இல்லை
பயமும்
பக்தியும் கூட இல்லை.
இந்த உலகில்
மலர்கள் இருக்கின்றன
என்பது தவிர
அவளுக்கு வேறொன்றுமில்லை.
- இசை
***
மூன்று வேகத்தடைகள் கொண்ட வாழ்வு
என் வீட்டிலிருந்து அலுவலகத்திற்கு மொத்தம்
மூன்று வேகத்தடைகள்
முதலாவது – மிக எளிமையான மலையேற்றம்
எவ்வளவு பெரிய அவசர வேலை என்றாலும்
என் பரபரப்பைக் குறைத்து கவனமாக வழியனுப்பும்
இரண்டாவது – ஒரு உறைந்துபோன பேரலை
பகல் ஆனந்தமாய் எரியும் பொன்கொன்றையின் நிழலை
இளைப்பாறவேண்டி சற்று கைமாற்றாக தந்தனுப்பும்
மூன்றாவது – அடிக்கடி தொந்தரவு செய்யும் இடை வீக்கம்
எதிர்பாராத நேரத்தில் பூதாகரமாய் இடைமறித்து
நம்பிக்கையோடு திட்டமிட்ட முடிவுகளை நிறுத்தி
இரக்கமின்றி வந்தபாதையிலேயே திருப்பி அனுப்பும்.
நான்காவதோ – எந்த கணக்கிலும் வராத கானல்மேடு
அன்றாடங்களினால் அமிழ்த்தி அமிழ்த்தி
அடையாளம் தெரியாதளவுக்கு மாறிவிட்டதன் தோற்றம்கண்டு
நானும் சாதாரணமாய் கடந்து வந்திருப்பேன்
பின்னர் யாரேனும் சொல்லித்தான் தெரியவரும்
ஒருசில விஷயங்கள் ஒருகாலத்தில்
எவ்வளவு தூரம் போற்றப்பட்டன என்று.
-
பெரு விஷ்ணுகுமார்
Comments
Post a Comment