சில தமிழ்க் கவிதைகள் - தேவதேவன்

அமைதி என்பது...

யுத்தங்களையெல்லாம் முடித்துவிட்டு

நான் உன்னருகே வருகிறேன்.

அமைதி என்பது மரண்த்தறுவாயோ?

வந்தமர்ந்த பறவையினால் 

அசையும் கிளையோ?

வாழ்வின் பொருள் புரியும்போது

உலக ஒழுங்குமுறையின் லட்சணமும்

புரிந்துவிடுகிறது.

அமைதி என்பது வாழ்வின் தலைவாயிலோ?

எழுந்துசென்ற பறவையினால் 

அசையும் கிளையோ?

***

சொற்களால் முடியாததை யெல்லாம்

சொல்லிக்கொண்டிருக்கிறது

இயற்கை

***

பொன் இருள் தீபம்

அறியாமையின் பொன் இருள் உன் கண்களில்;

உன் மடியில் பால் கறந்துகொண்டிருக்கும்

அந்த மனிதனின் கண்களிலோ

அனுபவத்தின் ரணம் படிந்த இயலாமைகள்;

வறண்ட தாவரம் போல் நிற்கும்

அவன் மனைவியின் கண்களிலோ

துயரங்களின் ஆறாத காயங்கள்;

கைக்குழந்தையின் வட்டமுகம் முழுக்க

அச்சத்தின் திக்பிரமைக் கறை;

முற்றத்தில் துள்ளி பாண்டி ஆடிக்கொண்டிருக்கும்

சிறுமியிடம் சற்றே எட்டிப் பார்க்கிறது

வாழ்வின் துளி இன்பம்,

பொன் இருளில் ஒளிரும் தீபம்.

***

தேவதேவன் தமிழ் விக்கி பக்கம்

***